உ
சிவமயம்
திருச்சிற்றம்பலம்

தமிழ்ச் சைவம்

- சைவ சரபம் மா.பட்டமுத்து

   


    "Philological nuances apart, there can be no difference between "democratic socialism" and "socialistic democracy". Both have the accent on socialism and that is an all-consuming monster and democracy, wherever juxtaposed, will be the sacrificial goat, in the event of a conflict between the two" (Swarajya - 16-5-1964)" சொற் பொருள் வேற்றுமை தவிர நடைமுறையில் "ஜனநாயக சோஷலிஸம்", " சோஷலிஸ ஜனநாயகம்" என்ற இரு தொடர்களுக்கும் பொருள் வேறுபாடு யாதுமில்லை. இரண்டிலும் சோஷலிஸம் என்ற பதத்திற்கே முக்கியத்துவம் வழங்கப்படுகிறது. அதுஎல்லாவற்றையும் விழுங்கும் பூதமாகும். இரண்டிற்கு மிடையே பூசல் எழுமாயின், பலியாகும் ஆடு ஜனநாயகமே" - என்பது அவ்வாங்கிலத்தின் கருத்து. அது அரயல் பற்றியதாகலின் இங்கு விடப்படுகிறது. ஆனால் சைவ சமயத்தவருள் ஒரு சாராரால் சமீப காலத்தில் வழங்கப்படும் வரும் சொற்றொடரொன்றை "சோஷலிஸ ஜனநாயகம்" என்ற தொடர் நினைப்பூட்டுகிறது. "தமிழ்ச் சைவம்" என்பதே அது. தமிழ், சைவம் இவற்றுள் முக்கியத்துவம் எதற்கு? அவர்கள் தமிழுக்கே என்பர். ஒரோ வழி அவர்கள் "சைவத்தமிழ்" என்றும் கூறுவதுண்டு. அந்நிலையிலும் தமிழுக்கே அவர்கள் ஏற்றம் தருவர்.

"தமிழ்ச் சைவம்" என்பதில் தமிழுக்கே மதிப்பு நல்கி சைவத்திற்கு அழிவு தேடுவது அச்சாராரின் செயல்.

"தொண்டர் நாதனைத் தூதிடை
விடுத்ததும் முதலை
யுண்ட பாலனை யழைத்தது
மெலும்புபெண் ணுருவாக்
கண்டதும் மறைக் கதவினைத்
திறந்ததுங் கன்னித்
தண்டமிழ்ச் சொலோ மறுபுலச்
சொற்களோ சாற்றீர்"-


என்ற திருவிளையாடற் புராணப் பாடலைத் தமது கொள்கைக்கு ஆதரவாகக் காட்ட முயல்வர். அம்முயற்சி சைவ சேவைக்கு முற்றிலும் முரணானது. இப்பாடலை,

"பாலை நெய்தல் பாடியதும் பரம்பொழியப் பாடியதுங்
காலனை யன்றேவிக் கராங் கொண்ட - பாலன்
மரணந் தவிர்த்ததுவு மற்ற வர்க்கு நந்தங்
கரணம போலல்லாமை காண்"


என்ற திருக்களிற்றுப்படியாரில் உள்ள பாசுரத்தோடு ஒருங்கே வைத்துப் பொருள் உணரும் ஆற்றல் இல்லாதவரே அவர். இவ்வற்புதங்களுக்காரணம் தமிழ் மொழியன்று; அப்பாடல் ஆசிரியர் பால் பதிந்து பிரகாசிக்கும் சிவசக்தியே என்பதை "சமய சாதன" ஆசிரியவர்கள் செய்த "நாடும் நவீனரும்" என்ற நூலிற் கண்டுணர்க.

    மெய்யாகவே சமயப்பற்று உடையவர்கள் சமயத்திற்கு முன் மொழியை வைக்க ஒருப்படார். "தமிழ்ச் சைவம்" என்பது போன்று தமிழ்ப் பெளத்தம், தமிழ் சமணம், தமிழ் இஸ்லாம், தமிழ்க் கிறித்தவம், வடமொழிக் கிறித்தவம், ஆங்கிலக் கிறித்தவம் என்றெல்லாம் வேறு சமயத்தவரில் யாரேனும் கூறியதுண்டா? அவை போகட்டும். சைவத்திலாவது தெலுங்குச் சைவம், மலையாளச் சைவம், ஆங்கிலச் சைவம், இந்திச் சைவம் என்றாவது உண்டா? 'தமிழ்ச் சைவம்' என்று கூறாது, "சைவம்" என்று மட்டுமே தமது சமயத்தினைக் குறிப்பிடும் சைவர்களுக்குத் தமிழ் மீது பற்றில்லை என்பது அச்சாராரது கருத்தா? ஆமெனின் அது முற்றிலும் தவறு. மொழி மீது மிதமிஞ்சிய பற்று வைத்துச் சமயத்தையும், சமய சாஸ்திரங்களையும் புறக்கணிக்கும் செயலை வேறு மதங்களிற் காண முடியாது. இவற்றையெல்லாம் அவர்கள் சிந்திப்பாராக.

    "தமிழ்ச் சைவம்" என்ற முழக்கத்தை இட்டுக் கொண்டே சைவரல்லாத தமிழர் சிலர் சைவ மக்களின் மரபுகளை அழிக்க முற்பட்டுள்ள செயல் சைவ நிலயங்களில் பரவி வருகிறது. சைவம் முதலாய சமயக் கோட்பாடுகள் இரத்தினங்கள். தமிழ் முதலாய மொழிகள் அவற்றைத் தம்மகத்தே கொண்ட பெட்டிகளே. பெட்டி மீது பெருகார்வம் கொண்டு இரத்தினத்தைப் பறிகொடுத்த "புத்திசாலிகள்" போன்று, தமிழ்ச் சைவர் எனப்பேசுவோர் நடமாடுகின்றனர்.

    சைவம் என்ற சமயப் பெயருக்கு முன் தமிழ் என்ற மொழிப் பெயரை வைப்பது தகாத செயல். "தமிழ்ச் சைவம்" என்றால், தமிழ் என்ற monster- முன் சைவம் என்ற goat-ஐ பலி கொடுப்பதே யாகும். சைவ சமய மேம்பாட்டிற் கருத்துள்ளோர் "தமிழ்ச் சைவம்" என்று பேசுவோர் பால் ஜாக்கிரதையாகப் பழகுவாராக.


     

Click this to download the pdf version of this Essay
 

மேன்மை கொள் சைவநீதி விளங்குக உலகமெல்லாம

"வைதிக சைவம் பரக்கவே"

                         

 

திருச்சிற்றம்பலம்.


இந்தக் கட்டுரை சமய சாதனம் மலர் 1 இதழ் 12 (1 July 1964) இல் வெளியிடப்ப்டடது.